ASINA KONTRATU SERVISU BA DIRETÓR EZEKUTIVU FONGTIL PERIODU 2026 – 2031

” Momentu istóriku ba FONGTIL”

Kinta – Feira, loron 09 abril 2026, iha Salaun Edifisiu FONGTIL, Caicoli Dili, Forum Organização Não Governamental Timor-Leste (FONGTIL) hala’o ona serimónia asina Akordu kontratu servisu entre Konsellu Fiskal FONGTIL ho Sr. Inocencio de Jesus Xavier nu’udar Diretór Ezekutivu foun ba mandatu 2026–2031.

Hafoin Prosesu rekrutamentu ne’ebé la’o durante fulan hirak liubá bazeia ba kritéria ne’ebé rigorozu no anunsiu ofisialmente ba publiku iha semana kotuk iha loron 31 marsu 2026, figura ne’ebé bele lori inovasaun no hametin liután knaar sosiedade sivíl nian iha Timor Leste.

Iha ninia diskursu badak, Diretór Ezekutivu FONGTIL Sr.Inocencio, katak iha nia Lideransa maka importansia oinsa atu Mentoria no Coaching hodi fo espasu ba membru FONGTIL sira no estaf sira atu halo kreatividades, servisu ho fleixibilidade maibe tenke disiplina no hatudu rezultadu servisu ne’ebe diak, tamba projetu hotu-hotu ne’ebe halao atu responde ba mandatu 4 FONGTIL, maka Empoderamentu membru, Advokasia, Koordenasaun no Dezaminasaun Informasaun.

Alem de ne’e Diretor Ezekutivu mos afirma katak iha nia mandatu sei esforsu makas atu buka fundus ba sustentabilidade sekretariadu FONGTIL no mos adaptasaun ba plataforma online sira ne’ebe sei fasilita servisu mandatu FONGTIL nian ho efektivu liu tan, nune’e mos hametin unidade entre membru sira no hametin parseria ho doadores no Governu hodi enfrenta dezafiu sosiál sira iha Timor-Leste.

Konseilu Fiskal FONGTIL no Ekipa Sekretariadu tomak fó benvindu ba Diretór foun. Ami haksolok ho prezensa lideransa foun ne’ebé prontu ona atu servisu hodi dignifika liután plataforma FONGTIL nian no Ami fiar katak ho esperiénsia no vizaun ne’ebé iha, FONGTIL sei kontinua sai lian ba povu no parseiru estratéjiku ba dezenvolvimentu nasionál.

Benvindu no susesu ba knaar foun!

#FONGTIL #LideransaFoun #SosiedadeSivil