FONGTIL: TIC TIMOR TENKI HAREE ONA REGULAMENTU ATU AJUDA EMA ATU HATENE KONABA UTILIZA PLATAFORMA MÉDIA SOSIÁL

FONGTIL: TIC TIMOR TENKI HAREE ONA REGULAMENTU ATU AJUDA EMA ATU HATENE KONABA UTILIZA PLATAFORMA MÉDIA SOSIÁL

Iha Segunda-feira loron 19 Janeiru 2026, Diretór Ezekutivu FONGTIL Sr. Inocençio de Jesus Xavier hetan entrevista husi Jornalista sira iha AJAR, Faról Díli hodi husu FONGTIL nia Prespetiva konaba utilizadór média sosiál balun ne’ebé uza ID dalsu hodi ataka lider sira no ema seluk iha médiá sosiál.

Liga ho Asuntu ne’e Diretór Ezekutivu FONGTIL Sr. Inocençio de Jesus Xavier hatete: “ Dalabarak ema utiliza média sosiál hodi espresa ema nia espresaun hodi kontra normas no valores kultura no moralidade ema nian. Entaun saida mak ita tenki haree mak utilizasaun média ne’e husi idade hira ba to’o hira? no presija halo prevensaun sira liuhusi sosializasaun konaba utilizasaun plataforma média sosiál, tanba ikus-ikus ne’e ita haree ema edita lider sira inklui destintu deputadu nain rua ne’ebé virál iha média sosiál, maibé aktu ida ne’e ha’u hanoin aktu polítika ida katak atu justifika no iha tendénsia hodi fó dalan ba ita-nia autór lejisladór sira no Governo atu kriminaliza atividade utilizasaun média sosiál ne’e. Ha’u deskonfia katak ema sira ne’ebé halo aktu ne’e ema iha kuiñesimentu di’ak mak halo aktu ne’e, para atu justifika katak Parlamentu ho Governu tenki halo buat ruma hodi kriminaliza asaun sira ne’e. Tanba ne’e hau hanoin Estadu ka Governu labele lakon ninia poder, maibé oinsá mak atu haree aktu sira ne’e, liu-liu TIC-Timor bele haree asuntu sira ne’e para oinsá bele regulariza utilizasaun média sosiál ho loloos no evita dalan seluk ne’ebé bele hamate fali liberdade espresaun liuhusi atividade sira seluk’’.

Alem de ida ne’e Diretór Ezekutivu FONGTIL Sr. Inocençio de Jesus Xavier hatete: ‘‘ Klaru katak ita-nia individu balu nia halaok ne’e kontra tebes ita-nia valor sira ne’ebé tuir loloos lapresija halo, maibé ita lahatene sé mak sira, sé mak iha hanoin to’o halo buat sira ne’e? Entaun ita presija haree ida ne’e”. Ne’ebé ha’u hanoin ba situasaun ida mak TIC Timor tenki haree ona regulamentu sira maibé regulamentu ida ne’ebé la’ós atu kriminaliza, maibé regulamentu ida ne’ebé atu ajuda ema atu hatene konaba utiliza plataforma média sosiál’’.