Diretór Ezekutivu Sekretariadu FONGTIL partisipa iha atividade Lansamentu Relatóriu Auditoria Sosiál Ba Programa Bolsa Méritu tinan 2022 ne’ebé realiza husi TLCE

Iha loron 23 fulan Fevereiru  Diretór Ezekutivu Sekretariadu Forum ONG Timor-Leste (FONGTIL) partisipa iha atividade Lansamentu Relatóriu Auditoria Sosiál Ba Programa Bolsa Méritu tinan 2022 ne’ebé realiza husi Timor-Leste Coalition Foe Education (TLCE).

Atividade ne’e hala’o iha Salaun Hotél Ramelau Ai-mutin Díli, ho objetivu atu aprezenta dadus peskiza sira no Deskobrementu sira husi TLCE ba Programa Bolsa Méritu Durante iha tinan 2022 nia laran.

Iha atividade ne’e, vise prezidenti konsellu TLCE sr. Francisco da C. Fernandes hateten “ peskiza ne’e hala’o hetan finansiamentu fundus husi SASCAS. Objetivu husi peskiza ne’e atu haree kle’an liu tan kona-ba efetividade servisu Ministériu Edukasaun nian liu-liu ba programa atribuisaun bolsa méritu ba mellór estudante iha teritóriu Timor-Leste, peskiza ne’e la kobre munisípiu hotu, maibé konsege hala’o de’it iha munisípiu hitu ( 7) mak hanesan : Ainaro, Bobonaro, Ermera, Manatuto, Manufahi, Oekuse no Viqueque. Litán ida ne’e  Vice Prezidenti Konsellu TLCE Sr. Francisco hateten “Importánsia husi programa ne’e mak hakma’an ekonómia família, no hanesan meio ida hodi motiva labarik sira estuda maka’as no badinas ba eskola”.

Aleénde ida ne’e, Diretór Ezekutivu FONGTIL Sr. Valentim da Costa Pinto hatutan tan katak  “ agradese ba servisu ne’ebé mak TLCE halo liu husi peskiza ida ne’e, TLCE hanesan parseiru servisu FONGTIL nian ne’ebé envolve iha rede setorál iha setór edukasaun nian, peskiza ida ne’e kontribui tebes ba servisu hamutuk entre FONGTIL no nia rede sira liu-liu iha área edukasaun nian no promove kontabilidade servisu no Boa Governasaun servisu fahe mós informasaun regulár liga ho finansiamentu públika nian iha setór edukasaun. Husi peskiza ne ita bele sukat ona benefisiáriu sira-nia sentimentu. Espera peskiza ne’e kontinua la’o iha programa seluk iha área edukasaun nian”.

Itán ida ne’e, Reprezentante Ministériu Edukasaun Sr. Joaquim Martins, hateten “programa ne kontinuasaun husi programa governo anteriór nian husi orsamentu jerál 2022 nian ho objetivu atu enkorja labarik sira estuda maka’as hadia sira-nia kapasidade intelektuál ba sira-nia futuru no dalan ida mós atu tulun Inan-Aman sira iha parte ekonómia nian, no espera rekomendasaun sira ne’ebé hetan husi deskobrementu ne bele solusiona hodi hadia di’ak liután implementasaun programa ne’e”.

Koordenadór Assesoria Sosiedade Sivíl e Diretór GASC nian eng Joaquim da Costa Freitas hateten  “agradese tebes ba ekipa nia esforsu ba servisu auditoria ida ne’e, konsege halibur ona dadus sira husi peskiza hodi rona direita husi estudante profesores no Inan-Aman sira kona-ba vantajem no desvantajem, dejeza susesu nafatin ba servisu auditoria sira maske SASCAS sei muda ba GASC maibé nafatin iha natureza no andamentu hnesan no ita presija muda nia kontekstu hodi kontribui di’ak liután atu promove Boa Governasaun”.

Atividade ne’e hetan Partisipasaun husi Ministériu Edukasaun, GASC, FONGTIL, Vice Prezidenti Konsellu TLCE, TLCE no Jornalista sira.