FONGTIL APREZENTA REZULTADU AUDITORIA SOSIÁL 2019 IHA ÁREA INFRAESTRUTURA BA MOP

DILI, 23 JULLU 2020: Ekipa sosiedade sivíl ne’ebé lidera husi Diretór Ezekutivu Forum Organizasaun Naun Govermentál Timor-Leste (FONGTIL), Sr. Daniel Santos do Carmo, iha Kinta-feira ne’e hala’o enkontru ho S. Exa, Ministru Obras Públikas (MOP), Arq. Salvador Eugénio Soares dos Reis Pires, hodi aprezenta rezultadu auditoria sosiál 2019 nian iha área infraestrutura ba MOP.

Iha aprezentasaun, Diretór FONGTIL informa katak, sosiedade sivíl apresia ho servisu Ministru Obras Públikas nian ne’ebé durante ne’e implementa projetu iha área infraestrutura ho transparánsia. Projetu hotu dezenvolve husi Governu depois kompañia sira kompete hodi implementa projetu sira, hodi garante kualidade projetu ne’e rasik.

Enkontru ne’e partisipa mós husi Diretór Ezekutivu Luta Hamutuk, Sr. José Alves da Costa, inklui Organizasaun Naun Govermentál seluk ne’ebé durante ne’e halo peskiza no auditoria iha área infraestrutura.

Ekipa sosiedade sivíl ne’e akompaña husi parte Gabinete Apoiu Sosiedade Sivíl iha Gabinete Primeiru Ministru nian.

Sr. Ministru Obras Públikas agradese ba sosiedade sivíl ne’ebé kontinua apoiu no tau-matan ba lala’ok ka servisu iha área infraestrutura.