FONGTIL: ESTADU NO GOVERNU LA SÉRIU ATU KOMBATE KORRUPSAUN IHA ITA-NIA RAIN

FONGTIL: ESTADU NO GOVERNU LA SÉRIU ATU KOMBATE KORRUPSAUN IHA ITA-NIA RAIN

Ohin Kinta-feira loron 22 Janeiru 2026, Diretór Ezekutivu FONGTIL Sr. Inocençio de Jesus Xavier hetan entrevista husi Jornalista sira iha AJAR, Faról Díli hodi husu Sosiedade Sivíl nia Prespetiva konaba Komisáriu Komisaun Anti Korrupsaun (KAK) rekuiñese katak KAK hetan presaun Husu Lider sira no husi Partidu Polítika.

Liga ho Asuntu ne’e, Diretór Ezekutivu FONGTIL Sr. Inocençio de Jesus Xavier hatete: “ Klaru katak kazu korrupsaun ne’e involve ema boot, sé ho presaun polítiku ne’e sei fó impaktu negativa ba efetividade no efisiénsia, servisu Komisaun Anti Korrupsaun nian liu-liu iha prevensaun no kombate korrupsaun. Agora tuir lei ne’e klaru tiha ona katak KAK iha kompeténsia atu halo servisu independente no imparsiál, maibé tuir ami-nia pontu de vista durante ne’e katak lei artigu 8 alinea d husi Komisaun Anti Korrupsaun nian hatete momoos hela katak komisáriu no adjuntu KAK sira ne’e la’ós ema polítiku sira, maibé ohin loron iha KAK rasik kuaze komisaríu sira ne’e ema husi kuadru polítiku hotu iha partidu CNRT nia laran, entaun ikus sira tenki simu konsekuénsia husi intervensaun polítika. Tanba ne’e mak instituisaun ne’e nu’udár instituisaun estadu tuir lei ne’ebé ko’alia konaba kompeténsia Komissaun Anti Korrupsaun ne’e tenki atribui duni komisaun ne’e atu hala’o nia servisu imparsiál no independente, no atu ajuda governu atu promove governasaun di’ak’’.

Alem de ida ne’e, Diretór Ezekutivu FONGTIL Sr. Inocençio de Jesus Xavier hatete: ‘‘ sé agora hanesan ita boot sira nia pergunta katak KAK hetan presaun husi lider polítiku sira hahú husi Xefe Estadu to’o Governo no Partidu Polítiku sira, entaun di’ak liu mak taka tiha KAK no husik Ministériu Públiku mak halo servisu, tanba duké harii instituisaun ida atu fó servisu ba malu maibé ita tuir ba halo kontrola ba nia servisu. Entaun Estadu no Governu la sériu atu kombate korrupsaun iha ita-nia rain. tanba ne’e mak ho respeitu tomak ha’u husu ba sé mak gosta tau nia kanuru tohar iha servisu KAK nian, favór hasai imi-nia liman iha ne’ebá, ne’e servisu kompeténsia Komisaun Anti Korrupsaun nian, ne’ebé laiha ema ida mak atu tau nia kanuru tohar ba servisu investigasaun husi Komisaun Anti Korrupsaun nian”.

Ikusliu, Diretór Ezekutivu FONGTIL Sr. Inocençio de Jesus Xavier hatete: “ dala ida tan husu atu Lider sira no Partidu Polítiku sira imi tenki ajuda Instituisaun KAK ne’e hodi halo boot no ho integridade hodi nune’e bele halo servisu ne’e di’ak liután iha futuru hodi salva estadu nia osan no bens públiku estadu nian”.