FONGTIL HALAO ATIVIDADE TREINAMENTU PLANU ESTRATÉJIKU HO MÉTODU PROJECT CYCLE MANAGEMENT (PCM) BA MEMBRU ONG REIJAUN RAI-KLARA

Iha loron 23 fulan Juñu tinan 2025, Sekretariadu Forum ONG Timor-Leste (FONGTIL) halao Atividade Treinamentu Planu Estratéjiku ho Métodu Project Cycle Management (PMC) ba Membru ONG rejiaun Rai-klaran. Treinamentu ne’e hala’o durante durante loron lima (5) hahú iha segunda loron 23 to’o loron 27 fulan Juñu 2025.

Treinamentu ne’e hala’o iha Salaun CEFOBOM, Munisípiu Manufahi ho Objetivu Atu hasa’e koñesementu Membru ONG konaba oinsa Dizeña Planu Estratejiku ho Métodu “Project Cycle Management/PCM, Atu Membru ONG iha koñesementu konaba : Analiza PCM, Dizeinu Matriks Planamentu Projeitu hodi priense (nia Goal,Objetivu Espesifiku/Outcome, Output, Planu Asaun, Planu Orsamentu, Dizeinu Proposta Projeitu no Hakerek Relatoriu), Atu Membru ONG sira depois treinamentu bele iha ona Draft Planu Estratejiku Organizasaun nian, Atu bele reforsa kapasidade institusionál NGO membru hodi asesu ba fundus doadór.

Iha Abertura Atividade ne’e Reprezentante Diretór Ezekutivu FONGTIL Sr. Lourenço Tito Ximenes Lopes, nu’udar Jestór Programa Hatete “FONGTIL nu’udar mahon ba ONG Internasionál, Nasionál no Lokál ne’ebé ho nia membru permanente 288, Treinamentu Rejiaun Rai-klaran ne’ebé kompostu membru ONG husi Aileu 6, Ainaro 4, Covalima 4 no Manufahi 9.

FONGTIL iha mandatu ha’at ne’ebé importante mak “Dezamina Informasaun, Koordenasaun, Advokasia no Empoderamentu membru. Treinamentu Planu Estratéjiku ho metódu Project Cycle Management (PCM) ne’e nu’udar parte husi mandatu empoderamentu membru.

Iha tinan 2025, FONGTIL hetan fundu Subvensaun Publiku husi Gabinete Apoiu Sosiedade Civil (GASC) hodi Haforsa Kapasidade Institusional Membru ONG no Promove Boa Governasaun. Treinamentu ohin ne’e parte ida husi apoiu fundus husi GASC”.

Alende ne’e, Exelensia Prezidenti Autoridade Munisípiu Manufahi, Sr. Luis Marçal da Costa Tavares hatete: “Agradese ba FONGTIL hili Munisípiu Manufahi sai fatin ba Formasaun NGO sira hamutuk 23 Kompostu husi NGO Aileu, Ainaro, Covalima no Manufahi. Liu-husi treinamentu ne’e bele hasa’e Koñesimentu hodi apoiu Planu Estratéjiku Sira ho di’ak hodi Apoia Governu Lokál ba implementasaun programa no atividade sira ne’ebé fo benefísiu ba komunidade.

ONG nu’udar parseiru prinsipál Governu ne’ebé maske hasoru hela difikuldade maibé nafatin kontinua la’o, servisu ki’ik ka bo’ot importante liu mak rejultadu. Papél ONG iha Rai Ida ne’e importante tebes, husu nafatin ONG sira nia kontribuisaun hato’o nafatin krítika Konstrutivu, Governu lokál konsidera liu-husi kritika sira ne’e mak Ita hadia di’ak-liu tan ita nia servisu. Espera katak durante loron 5 ne’e bele aproveita koñesementu hodi husi fasilitadór nune’e bele servi ita nia Rai no komunidade”.

Ikusliu, Reprezentante Kordenadór Gabinete Apoiu Sosiedade Sivil (GASC), Sra. Suzety Soares nu’udar Diretóra Nasionál Programasaun GASC hateten: “Apresia ba servisu FONGTIL nian ho treinamentu ne’e bele hasa’e membru ONG sira nia koñesemntu konaba Planu Estratéjiku hodi nune’e bele adopta ba fundus husi doadór nian. Sra. Suzety Soares mós husu ba ONG sira atu lee didi’ak matadalan sira no dezenvolve proposta tuir madalan doadór nian. Nia mós akresenta katak tempu badak GASC sei sosializa fundu Subvensaun Públika ba ONG sira atu ONG sira bele partisipa komprende matadalan subvensaun ne’e kada tinan GASC fo sai”.

Atividade Treinamentu ne’e hetan Partisipasaun husi : Prezidenti Autoridade Munisípiu (PAM) Manufahi, Gabinete Apoiu Sosiedade Civil (GASC), Sefi Departementu Asuntu Sosial no Organizasaun Komunitaria, Media PAM Manufahi, Media Racom Maubisse Mauloko, GASC, ONG husi Reijaun Rai-Klaran (Aileu, Ainaro, Covalima no Manufahi) no Sekretariadu FONGTIL.

Atividade ne’e hetan apoiu fundus husi: GASC