FONGTIL: HANESAN ALUMNIE HA’U KONTRA DEKLARASAUN, PM NO EIS-REITÓR SIRA NIA  LAMENTASAUN KONABA ATUASAUN PNTL IHA AUTONOMU KAMPUS BA REITÓR UNTL.

FONGTIL: HANESAN ALUMNIE HA’U KONTRA DEKLARASAUN, PM NO EIS-REITÓR SIRA NIA  LAMENTASAUN KONABA ATUASAUN PNTL IHA AUTONOMU KAMPUS BA REITÓR UNTL.

Ohin Segunda-feira loron 19 Janeiru 2026, Diretór Ezekutivu FONGTIL Sr. Inocençio de Jesus Xavier hetan entrevista husi Jornalista sira iha AJAR, Faról Díli hodi husu FONGTIL nia Prespetiva konaba deklarasaun Prezidenti da Repúblika, Primeiru-Ministru no eis-Reitór sira nia  Lamentasaun konaba Atuasaun PNTL iha Autonomu Kampus ba Reitór UNTL.

Liga ho Asuntu ne’e Diretór Ezekutivu FONGTIL Sr. Inocençio de Jesus Xavier hatete: “ Agradese ba ita-nia Prezidenti da Repúblika, ita-nia Primeiru-Ministru, eis-Reitór no Fundadór UNTL sira tanba bele hakfodak iha tempu ida kapturasaun ba Reitór ho nia Estrutura sira. Atu fó hatene ba  Prezidenti da Repúblika, ita-nia Primeiru-Ministru, eis-Reitór no Fundadór UNTL sira katak kampuz polísia la’ós foin tama no polísia tama mós tanba hetan orientasaun husi Reitór sira. Iha 2015 iha Fakuldade Siénsias Sosiais dadersan tuku ne’en (6) polísia tama kampus no reitór sira mak autoriza, maibé ita laharee eis-Reitór no Fundadór UNTL sira ko’alia konaba asuntu ne’e. Iha asaun manifestasaun durante ne’e iha Fakuldade Agrikultura no Direitu  nia oin ne’e Polísia tiru rahun kampus ho gas lacrimógeneo kaptura Estudante sira aula laran eis-Reitór no Fundadór UNTL sira la ko’alia buat ida, será ke Estudante sira laiha dignidade hanesan ho Reitór ne’ebé agora polísia kaptura dada’uk ne’e? Ha’u hanoin ida ne’e deklarasaun polítiku. Agora liga ba kestaun atuál Reitór ne’ebé hetan kapturasaun ho detensaun iha nia mandatu mós nia telefone ba polísia hodi kaptura estudante sira iha kampus. Entaun Autonomia kampuz ne’e Estrutura Reitór mak viola uluk. Ami alumnie ho estudante ativu sira ne’ebé mak defende integridade no autonomia kampuz ne’e ami mak ladi’ak fali. Agora polísia kaptura imi, imi dehan ne’e ladi’ak fali no komesa ko’alia konaba Autonomia kampuz no durante ami mak defende integridade no autonomia kampuz ita boot sira ba ne’ebé?”.

Alem de ida ne’e Diretór Ezekutivu FONGTIL Sr. Inocençio de Jesus Xavier hatete: ‘‘ Hanesan Alumnie no Estudante ativu ba kestaun ne’e ami mós lamenta hotu tanba será ke ami sira ne’e laiha dignidade hanesan ema? Tanba sira iha títulu ne’e mak tenki trata sira ho dignu? Ha’u hanoin katak polisia tama ba kampuz ne’e tanba mandadu, maibé antes ne’e polísia tama kampuz sem iha mandadu ruma halo agresaun fíziku baa mi ne’e eis-Reitór no Fundadór UNTL sira iha ne’ebé? Ha’u preokupa ho deklarasaun ne’e, hanesan Alumnie ha’u kontra deklarasaun ne’e no ha’u apoiu polísia nia atuasaun maibé atu fó hanoin ba polísia atu asegura nafatin polísia nia Visibility Involvement Professional (VIP) ne’e hodi uza forsa tuir nia natureza, ne’ebé ha’u apoiu atuasaun polísia nian ne’ebé tama kampuz tanba iha orientasaun mandadu. Sira halo asaun ne’e iha oras servisu, tanba ne’e mak polísia tenki ba foti sira iha oras servisu nian tau algelma, tanba ami mós polísia tau algelma maibé ami nia interese ne’e interese komum  ne’e ha’u laharee Reitór ida ka eis-Reitór no Fundadór UNTL sira ida ne’ebé defende luta ba ema hotu nia interese, tanba ne’e ha’u lamenta oituan ho deklarasaun sira ne’e, meibé buat balu ne’ebé polísia presija hadia mak Standard Operational Procedure (SOP) ne’e ”.

Ikusliu, Diretór Ezekutivu FONGTIL Sr. Inocençio de Jesus Xavier hatete: “ Husu ba Prezidenti da Repúblika no ba Primeiru-Ministru hakarak atu krítika karik husu ba Ministériu Interiór no ba Comando Jerál sira atu hadia Polísia nia Standard Operational Procedure (SOP) atuasaun nian, agora it aba krítika fali será ke ita laharee ba ita-nia polítika SOP sira, tenki Hadia mak SOP ne’e sé sira ladun intende fó formasaun ba sira no ho ida ne’e mak ita bele hadia la’ós kondena de’it’’.