FONGTIL HO REBAS-TL HALO DIALOGO KONA-BA HAFORSA KOLABORASAUN SERVISU ENTRE MINISTÉRIO SAÚDE HO ORGANIZASAUN SOSIEDADE SIVÍL

Iha loron 11 Fulan Marsu Tinan 2024 FONGTIL ho Rede ba Saúde Timor-Leste (REBAS-TL) Halo Dialogo kona-ba Haforsa Kolaborasaun Servisu Entre Ministério Súde ho Organizasaun Sosiedade Sivíl (OSS) hodi Lori Kualidade Servisu Saúde ba Timor Oan Hotu.

Iha Dialogo ne’e, Diretór Ezekutivo FONGTIL Sr. Valentim da Costa Pinto iha ninia diskursu  hateten “FONGTIL ho REBAS-TL hetan tan oportunidade liu husi sesaun ida Dialógo ne’ebé ke hanesan apresiasaun ida hanesan komitmentu ida ne’ebé kontinua promove espasu síviku entre Governu ho Sosiedade Sivil kolia kona-ba asuntu hotu-hotu ne’ebé hala’o iha ita-nia Rai. hato’o agradesimentu ba USAID ba ninia apoiu tékniku no finanseiru hodi servisu hamutuk hasa’e papél Oraganizasaun Sosiedade sivíl nian iha hadi’a Saúde iha Tior-Leste USAID nia Apoiu sai nu’udar instrumentu hodi reforsa Kapasidade Organizasaun Sosiedade Sivíl Sira nian atu envolve ho Ministerio Saúde no parte interesada sira iha setór Saúde nian”.

Aleinde ne’e Reprezenta Ministériu Saúde Timor-Leste Dra. Adelia M. M. Bareto, hateten “priviléjiu boot ba Ministerio da Sáude hodi bele partisipa iha diálogu hodi bele haforsa kolaborasaun servisu Entre Ministerio Saúde no Sosiedade Sivíl sira agradese mós ba USAID iha nafatin Komitmentu hodi fó apoiu, oinsá mós Ministerio Saúde ninia kooperasaun ho kolaborasaun sosiedade sivíl sira sempre mós konvida Ministerio Saúde ba iha diálogu hotu enkontru no treinamentu Sosiedade Sivil Sempre Konvida Ministerio Saúde”.

Ho nune’e, USAID Timor-Leste Dra.Telma de Oliveira, hateten “kontente tebe-tebes tanba hamutuk ona ho sosiedade Sivil ho Ministerio Saúde no mós fó parabéns ba FONGTIL/REBAS-TL tanba halo ona diálogu ida ne’e ho objetivu ida ne’e mosu ho nia Prioridade katak FONGTIL ho REBAS-TL estabelese ona hodi hala’o papél importante ida iha área Saúde no halo Dialógo Nasioanal ho inisiativa ida ne’e hodi halibur hamutuk hodi fornese Plataforma ida hodi bele fahe progresu iha dezenvolvimentu Saúde nian no kolabora identifika sira hodi responde ba destinasaun sira ne’e no diálogu Nasional ida ne’e sai hanesan forum ida atu promove engazamentu Siviku no fó kontribui ba fortalesimentu ba Sistema Saúde nia”.

Liután ida ne’e, Koordenadór Rede ba Saúde Timor-Leste (REBAS-TL) Sr. Joaquim Freitas Soare hateten  “ Objetivu hodi harii rede ida ne’e atu halo advokasia Asuntu Saúde iha Timor Leste no Rede ida ne’e ninia kanál matan tilun ibun ba Komunidade no mós matan tilun ba Ministerio Saúde sai hanesan mós ponte ida para atu partilla informasaun sira ne’ebé ke ita-nia Komunidade sira hasoru, orgullu tebes ba organiza eventu ida ne’e ita bele halo dialógo no mós bele aprezenta faktus balun ne’ebé ke ita rekolla para sai hanesan evidénsia ida hodi hato’o ba estadu liuliu ba Ministerio Saúde para bele foti asaun ruma atende dezafiu sira ne’ebé mak ita-nia komunidade sira enfrenta iha base”.

Alende ida ne’e, Diretór KATALPA Sr. Anders Hoester mós halo aprezentasaun kona-ba Sistema Digitalizasaun sira no elabora dezain sira hotu hodi bele halo programa dezenvolvimentu no rezultadu ba ita-nia planu liu husi teknolojia nian.

Dialogo ne’e hetan Partisipa Husi Reprezenta Ministerio Saúde, USAID Timor-Leste, Estudante Universidade, Organizasaun Sosiedade Sivil, no KATALPA.