FONGTIL Partisipa iha Enkontru ne’ebé Organiza husi INDDICA kona-ba Dezenvolvimentu Labarik Idade Infansia Nasionál (DLII)

Ohin loron 09 fulan Fevereiru tinan 2024, Sekretariadu Forum ONG Timor-Leste (FONGTIL) partisipa enkontru ne’ebé organiza husi INDDICA I,P  kona-ba Dezenvolvimentu Labarik Idade Infansia Nasionál (DLII) (Sigla Ingles ECD).

Enkontru ne’e hala’o iha Salaun Comissão Nacional das Eleições (CNE) Caicoli, Díli ho Objetivu atu dezenvolve no implementa Planu Monitorizasaun ida hodi asegura katak Ministériu relevante sira, no suporta husi parseiru dezenvolvimentu sira, no Implementa Polítika Nasionál ECD nian liuhusi inklui ninia atividade sira iha planu asaun annuál Ministériu nian.

Iha Enkontru ne’e Diretór Ezekutivu FONGTIL Sr. Valentim da Costa Pinto iha ninia intervensaun hatete “ polítika ida ne’e tenki iha pezu bele influénsia ba Ministériu sira, liu-liu Ministériu Edukasaun, Ministériu Obras Publika atu promove fasilidade ne’ebé  inkluzivu ne’e tenki iha pezu para bele fó mudansa, tanba ami-nia observasaun ne’e bazeia ba direitus humanus entaun direitu labarik ne’e tenki asegura iha investimentu sira ne’ebé mai liuhusi ministériu sira ne’ebé tutela iha polítika ida ne’e ”. liután ida ne’e, Diretór Ezekutivu FONGTIL Sr. Valentim da Costa Pinto mós hateten “ em termus de konseitu di’ak ona, mais ha’u hanoin tenki iha apoiu morál polítika ne’ebé boot para hanoin di’ak ne’e tenki iha espasu iha prioridade ba Ministériu sira ”.

Hatan ba Intervensaun ne’e Prezidenti INDDICA I,P. Sra. Dinorah Granadeiro hateten “ tanba ne’e mak ita tenki finaliza iha tempu badak hodi lori ba Konsellu Ministru, wainhira ita iha ona aprovasaun husi Konsellu Ministru, ita iha pezu polítika atu Implementa Polítika Nasionál ida ne’e, agora sei draff hela, maibé ita grupo traballu tenki hahú ona atu intende di’ak prosesu sira ne’e hotu, atu nune’e wainhira ita mai ho dezenvolvimentu no ita-nia Planu Monitorizasaun ita mós intende di’ak kona-ba polítika ida ne’e hodi hein ninia aprovasaun hodi ita bele halo implementasaun liu-liu ba monitorizasaun ”.

Enkontru ida ne’e hetan partisipasaun husi : INDDICA I,P, FONGTIL, UNESCO, UNICEF, Embassy of Japaun, New Zeland Embassy, KOICA, Uniaun Europeia, DFAT, World Bank, MOE, MSSI no UPM.