FONGTIL realiza atividade Treinamentu Siklu Advokasia ba membru ONG sira

Iha loron 19 Marsu 2024 Sekretariadu Forum ONG Timor-Leste (FONGTIL) realiza atividade Treinamentu Siklu Advokasia ba membru ONG Rejiaun Leste no Rejiaun Oeste.

Treinamentu Siklu Advokasia hala’o iha Salaun Xanana Reading Room ho Objetivu atu Fó kapasitasaun ba membru ONG sira husi Rejiaun Leste no Oeste nian durante loron 3 nia laran.

Iha treinamentu ne’e Prezidente Konsellu Fiskál FONGTIL hanesan mós Reprezentante Diretór Ezekutivu FONGTIL, Sr. Inocencio Xavier iha nia Diskursu hateten “treinamentu Siklu advokasia ne’e importante tebes ba servisu públiku, Lori reprezentante Diretór nia naran hato’o bem-vindu partisipante sira no aproveita materia durante loron 3, sei ajuda ita-bo’ot hodi halo mudansa, tanba Servisu Advokasia labele mesak no tenki liuhusi ekipa ka rede ne’ebé ho objetivu klaru. Hanesan FONGTIL bele hetan projetu maibé labele se’es hosi mandatu (4) ha’at”.

Liután ida ne’e Prezidente Konsellu Fiskál FONGTIL hanesan mós Reprezentante Diretór Ezekutivu FONGTIL, Sr. Inocencio Xavier mós hatutan katak “atu halo advokasia tenki hare ba ita nia area nune’e bele hetan rejultadu tanba servisu hotu ne’ebé halo pelumenus hetan netik rezultadu. Hanesan Ba hirak ne’ebé hamutuk iha projetu Spotligth bele aposta isu advokasia ne’e ho materia treinamentu”.

Alende ida ne’e, Koordenadór Asuntu Sosiedade Sivil GVPM no Diretór SASCAS, Sr. Joaquim da Costa Freitas iha nia Diskursu hateten “Advokasia karik mak falla mak servisu hotu sei la la’o, Ezemplu advokasia ne’ebé susesu iha Timór mak ukun-an, liuhusi servisu hamutuk ho Nasaun seluk lubuk ida no servisu advokasia ema balun tenki sai vitima/mate, maski nune’e konsege hetan rejultadu. Sentidu Advokasia iha Dimensaun (2) rua :Dimensaun primeiru funu hasoru kiak, iha kontestu Timór, tuir Banku Mundiál nian uma la iha janela, Varanda no seluk tan; Advokasia Dimensaun Orgaizasaun Sosiedade Sivíl halo nu’udar ponte ba Governu no Dimensaun seluk sai parseiru. Tanba ne’e mak Advokasia tenki kontra ba desizaun governu nian ne’ebé foti no fó dezvantajem ba povu. Nia mós husu atu halo mós advokasia ba mestre sira ne’ebé derepente de’it ba asina tiha ona kontratu maibé tenki mai ho dadús. Advokasia Dimensaun públiku ne’ebé fó vitima ba povu ne’e iha ita-bo’ot sira nia kontratu ne’e la iha artigu ida mak dehan labele kritiku. Tanba ne’e lalika tauk atu halo kritiku, faze kritiku mak hanesan wainhira desizaun balun ne’ebé governu foti fo vitima ba povu mak faze primeiru organiza, sengundu prepara Karta hodi halo aprosimasaun no faze ikus liu mak demo. Ko’alia konaba advokasia presiza tebes rede nune’e bele foku ba area sira”. Ikus liu , Koordenadór Asuntu Sosiedade Sivil GVPM no Diretór SASCAS, Sr. Joaquim da Costa Freitas mós husu ba FONGTIL  katak “se bele ba futuru karik halo mós advokasia ho modul nivél labele mai ko’alia de’it báziku nune’e labele halo ema bele aprende. hanesan materia Lidership tenki iha ona modul nivél”.

Partisipante husi treinamentu mai husi: SASCAS, Konsellu Fiskal FONGTIL, Membru ONG no Pontu Fokál FONGTIL husi Rejiaun Leste no Oeste.

Atividade ne’e Fundus husi SASCAS.