Sekretariadu Forum ONG Timor-Leste (FONGTIL), hala’o atividade Sosializasaun “Manuál Jestaun ba Fundu Sosiedade Sivíl” ba Membru ONG Rejiaun Sentrál (Munisípiu Díli, Atáuru no RAEOA).

Iha loron 02 fulan Fevereiru tinan 2024, Sekretariadu Forum ONG Timor-Leste (FONGTIL) no SASCAS hala’o atividade Sosializasaun “Manuál Jestaun ba Fundu Sosiedade Sivíl”  ba Membru ONG Rejiaun Sentrál ne’ebé kompostu husi Munisípiu Atáuro, Díli, no REAOA.

Atividade ne’e halo iha Salaun Nobel da Paz, Universidade Católica Timorense, Díli, ho objetivu atu halo sosializasaun ba matadalan proposta SASCAS nian hanesan dalan ida hodi fasilita membru ONG husi Munisípiu Díli, Atáuru no RAEOA sira atu bele aplika ba fundus SASCAS 2024 nian.

Iha atividade ne’e Diretór Ezekutivu FONGTIL Sr. Valentim da Costa Pinto iha ninia diskursu hateten “ loos duni ita la nega ita iha situasaun kona-ba jestaun finansiamentu ne’ebé sai hanesan instrumentu ida ne’ebé ita haree xave loos, ne’ebé bele orienta ita-nia misaun ka programa sira ne’ebé ita dezeña iha ita-nia organizasaun ida-idak. Ba ida ne’e ita agradese tanba kuaze husi 2015 mai to’o agora ita iha gabinete ida ne’ebé sempre anúnsiu sira-nia  oportunidade iha tinan-tinan ne’ebé permite ita hotu bele kompete no hetan apoiu husi gabineti sosiedade sivíl iha tinan 2 ba kotuk ita muda ba servisu apoiu sosiedade sivil e auditoria sosial, ne’ebé ita hotu-hotu balu bele tinan-tinan hetan nafatin balu mós la hetan ”.

Liután ida ne’e, Diretór Ezekutivu FONGTIL Sr. Valentim da Costa Pinto hateten “ atu passa ida ne’e ita hotu hotu presija priense prosesu balu, kuandu la passa ne’e hanesan notas ida ne’ebé ita presija tenki hadia, se oportunidade mai fali ita presija kompleta saidá para bele asegura ita nia proposta ne’e”.

Alende ne’e, Koordenadór Assesoria Sosiedade Sivíl e Diretór SASCAS Eng. Joaquim da Costa Freitas “sorumutu ida ne’e liga mós ba iha Manuál Jestaun Fundus Sosiedade Sivíl, tanba ida ne’e mak halo ita hasoru malu iha ne’e ho esperansa ida katak tempu ida ne’ebé maki ta termina ita hotu sei tama iha koridór ida ne’e,  ho imi-nia komentariu, Sujestaun no esperansa sira, katak Gabineti ida ne’e sei bele halo buat ruma ba Oin, la’ós halo de’it maibé halo ho Di’ak nomós ho Responsabilidade. Lakohi promote buat ida ba imi, mais ho hakarak ida katak ita hotu tama iha prosesu aprendizajen mais se bele aprendizazen ne’e se bele karik remata ona ne’ebé agora ita tenki hanoin se imi simu fundus ituan ka barak karik halo tuir saidá mak imi hakerek iha proposta, orsamentu ba Sosiedade Sivíl ne’e Disponivél ba ema hotu no Organizasaun hotu iha Direitu hanesan  depende se mak di’ak liu tanba kompete”.

Liután ida ne’e, Koordenadór Assesoria Sosiedade Sivíl e Diretór SASCAS Eng. Joaquim Freitas mós hateten “ ida ne’e laos hasoru malu ikus maibé ida ne’e inisiu mak ne’e no durante tinan ha’at (4) ne’e ita bele hasoru malu bei-beik mais ba sosializasaun ne’e dala ida de’it tinan oin ne’e laiha ona ”.

Atividade ne’e hetan Partisipasaun husi SASCAS, Sekretariadu FONGTIL, Rede Sektorál sira husi Munisípiu Díli, Atáuru no RAEOA, Membru ONG sira husi  Munisípiu Díli, Atáuru no RAEOA.

Atividade ne’e finansia husi fundus SASCAS.